బీజేపీ బండికి.. సంజయుడే సారథి

ఎవరీ బండి సంజయ్? ఎక్కడ నుండి వచ్చాడు? ఎందుకు ఈ స్థాయిలో ఆయన పేరు మారుమోగిపోతుంది? రెండు తెలుగు రాష్టాల ప్రజల్లో తొలుస్తున్న ప్రశ్నలు సుదీర్ఘ కాలం పాటు పోరాటం, ఉద్యమం చేసి తెలంగాణ అంటే.. కేసీఆర్ అనే స్థాయికి వెళ్లారు. తన తండ్రి మరణం తర్వాత ఓదార్పు యాత్రలు, పాదయాత్రలు అంటూ పదేళ్లు పోరాటం తర్వాత జగన్ సీఎం అయ్యారు. కానీ ఇవేమీ లేకుండానే బండి సంజయ్ దేశ వ్యాప్తంగా ఇంత సంచలనం అయ్యారు..జీహెచ్ఎంసీ ఎన్నికల తర్వాత బండి సంజయ్ గురించి గూగుల్ లోనెటిజన్లు విపరీతంగా వెతికేస్తున్నారు.
నిన్న మొన్నటి వరకు కరీంనగర్ కు పరిమితమైన వ్యక్తి. మున్సిపల్ కార్పొరేటర్ తర్వాత లోక్ సభ సభ్యుడుగా తొలిసారి గెలిచారు. ఇప్పుడు తెలంగాణ అంతటా ఆయన గురించే చర్చ. ఆయన పేరు బండి సంజయ్. బీజేపీ లో హేమాహేమీలుగా పేరు పొందిన కిషన్ రెడ్డి, లక్ష్మణ్ వంటి నాయకులందరినీ వెనక్కి నెట్టేశారు. గ్రేటర్ హైదరాబాద్ ఎన్నికల ప్రచారాన్ని “సర్జికల్ స్ట్రైక్” క్షిపణితో హైజాక్ చేసి అరివీర భయంకర వ్యూహకర్త అయిన కేసీఆర్ కు “చెక్” పెట్టిన వ్యక్తి బీజేపీ రాష్ట్ర అధ్యక్షుడు బండి సంజయ్. హిందుత్వ ఎజెండాను అమలు చేయడంలో, టీఆర్ఎస్ను దీటుగా ఎదుర్కోవడంలో ముందుండటంతో జాతీయ నాయకత్వం బండి సంజయ్ వైపు మొగ్గు చూపింది. ఆర్ఎస్ఎస్తో ఉన్న అనుబంధం, పార్టీ ఆదేశాలను తు.చ. తప్పకుండా పని చేసే నేతగా, పక్కా హిందూత్వవాదిగా పేరుండటంతో రాష్ట్ర పార్టీ అధ్యక్షుడిగా కరీంనగర్ ఎంపీ సంజయ్ను పార్టీ జాతీయ అధ్యక్షుడు జేపీ నడ్డా నియమించారు. 2023లో రాష్ట్రంలో అధికారంలోకి తేవాలన్న లక్ష్యంతో ఉన్న జాతీయ పార్టీ.. రాష్ట్రంలో హిందుత్వ ఎజెండా అమలు, పార్టీని ప్రత్యామ్నాయ రాజకీయ శక్తిగా బలోపేతం చేసేందుకు సంజయ్కే అధ్యక్షపదవి ఇచ్చింది
స్వయం సేవక్ అనుభవం, కలుపుగోలుతనం..
చిన్ననాటి నుంచి స్వయం సేవక్గా అలవాటైన క్రమశిక్షణ.. హిందూ ధర్మంపై విశ్వాసం.. విద్యార్థి ఉద్యమాల్లో చురుకైన పాత్ర.. కరీంనగర్ అర్బన్ బ్యాంకు డైరెక్టర్గా, మున్సిపల్ కార్పొరేటర్గా అందించిన సేవలు.. అవినీతికి దూరంగా ఉండటం.. రాజకీయంగా విమర్శలు చేయడమే తప్ప అన్ని పార్టీల వారితోనూ వ్యక్తిగతంగా కలుపుగోలుగా ఉండటం అతనికి కలిసి వచ్చింది
సామాన్య మధ్య తరగతి కుటుంబం నుంచి..
బండి సంజయ్ కుమార్ది సామాన్య మధ్య తరగతి కుటుంబం. ఆయన తండ్రి బండి నర్సయ్య ప్రభుత్వ టీచర్గా పనిచేసేవారు. అయితే.. ఎక్కువ కాలం డిప్యుటేషన్ మీద జిల్లా పరిషత్లో విధులు నిర్వహించారు. పదవీ విరమణ చేసిన తర్వాత కూడా ప్రైవేట్ స్కూల్లో టీచర్గా పనిచేసేవారు. 25 ఏళ్ల కిందట ప్రమాదవశాత్తూ ఇంటిపైన ట్యాంక్ కూలి ఆయన మరణించారు. అమ్మ శకుంతల గృహిణి. బండి సంజయ్ తల్లిదండ్రులకు నలుగురు సంతానం. ఇద్దరు అన్నలు, ఒక అక్క తర్వాత ఇంట్లో అందరికంటే చిన్నవాడు ఆయనే. బండి సంజయ్ కుటుంబం ఎక్కువ కాలం కరీంనగర్ కాపువాడలో నివసించేది. ఆ తర్వాత జ్యోతినగర్కు షిఫ్ట్ అయ్యారు. బండి సంజయ్ భార్య అపర్ణ ఎస్బీఐ ఉద్యోగినిగా పనిచేస్తున్నారు. వీరికి ఇద్దరు కుమారులు.
అద్వానీ రథయాత్రలో ఇంఛార్జ్గా..
1996లో బీజేపీ అగ్రనేత ఎల్కే అద్వానీ సురాజ్ రథయాత్ర చేపట్టారు. దేశవ్యాప్తంగా వివిధ రాష్ట్రాలను చుట్టివచ్చిన ఆయన.. కరీంనగర్ యాత్రకు వచ్చారు. ఈ సందర్భంగా బండి సంజయ్ వేకువజామునే చౌరస్తాలో జెండాలు కడుతుంటే నాటి మెట్పల్లి ఎమ్మెల్యే విద్యాసాగర్ రావు చూసి చలించిపోయారు. మరుసటి రోజు రథయాత్ర సందర్భంగా జరిగిన సభలో అద్వానీకి గంట గంటకు టీ ఇప్పించే పని అప్పగించారు. తర్వాత వెంకయ్యనాయుడు ద్వారా సిఫార్సు చేసి ఆయణ్ని అద్వానీ రథయాత్ర వాహన శ్రేణికి ఇన్చార్జిగా నియమించారు. ఇది బండి సంజయ్ జీవితాన్ని పూర్తిగా మలుపుతిప్పింది.
మలుపు తిప్పిన ఢిల్లీ లైఫ్..
బండి సంజయ్ తల్లిదండ్రులు కరీంనగర్ కాపువాడలో ఉన్నప్పుడు ఆయణ్ని ఒకటో తరగతిలో సరస్వతి శిశుమందిర్లో చేర్పించారు. శిశుమందిర్ నుంచే ఆర్ఎస్ఎస్తో అనుబంధం ఏర్పడింది. రోజూ శాఖకు వెళ్లేవారు. ఆర్ఎస్ఎస్లో ఘటన్ నాయక్గా, ముఖ్య శిక్షక్గా ప్రాథమిక విద్యా స్థాయిలోనే పనిచేశారు. సరస్వతి శిశుమందిర్ ద్వారా తనకు విద్యతో పాటు క్రమశిక్షణ అలవడిందని ఆయన చెబుతారు. తనకు నాయకత్వ లక్షణాలను ఆర్ఎస్ఎస్ నేర్పిందని.. ఇప్పటికీ స్వయక్ సేవక్ని అని చెప్పుకోవడానికి గర్వపడతానని బండి సంజయ్ ఓ సందర్భంలో చెప్పారు. ఎన్నికల నేపథ్యంలో అద్వానీ రథయాత్ర నిలిచిపోవడంతో బండి సంజయ్ను ఢిల్లీ సెంట్రల్ ఆఫీస్లో సహాయక్గా పంపించారు. ఇది మరో మలుపు తిప్పింది. సెంట్రల్ ఆఫీసులో ఉండి అద్వానీకి, వెంకయ్యనాయుడుకు సేవలు చేశారు. ఈ సమయంలో వారి నుంచి చాలా విషయాలు నేర్చుకున్నానని బండి సంజయ్ చెబుతారు.
బొట్టు తెచ్చిన తిప్పలు.. అయినా ఇప్పటికీ అదే ప్రత్యేకత
హిందూ ధర్మాన్ని అనుసరించే బండి సంజయ్కి.. చిన్ననాటి నుంచే తన నుదిటిపై కుంకుమ బొట్టును ధరించడం అలవాటు. అలా బొట్టు పెట్టుకోవడం వల్ల కొన్ని విద్యా సంస్థల్లో అనుమతి నిరాకరించారని ఆయన చెప్పారు. అలాగని.. తన పద్ధతి మార్చుకోలేదని ఆయన గర్వంగా చెబుతారు. రెండుసార్లు కరీంనగర్ ఎమ్మెల్యేగా పోటీ చేసి ఓడిపోయిన బండి సంజయ్.. భారీ మెజారిటీతో కరీంనగర్ ఎంపీగా గెలవడం రాజకీయ వర్గాలను ఆశ్చర్యానికి గురి చేసింది. నిత్యం ప్రజలతో మమేకమవడం, కుటుంబ సభ్యుల ప్రోత్సాహామే తన విజయానికి కారణమని ఆయన చెబుతారు.
చిరంజీవి డాన్స్, ఫైట్స్ అంటే ఇష్టం..
విద్యార్థి దశ నుంచి సినిమాలు బాగా చూసేవాడినని బండి సంజయ్ తెలిపారు. ఖాళీ దొరికితే ఫ్రెండ్స్తో కలిసి సినిమాలు చూసేవాడినని ఆయన చెప్పారు. ప్రత్యేకంగా అభిమాన హీరోలు అంటూ ఎవరూ లేకపోయినా.. చిరంజీవి డాన్స్, ఫైట్స్ అంటే ఇష్టం ఉండేదని ఆయన చెప్పారు. అయితే.. రాజకీయంగా బిజీ అయిపోవడం వల్ల గత ఐదారేళ్లుగా సినిమాలకు దూరమయ్యానని ఆయన చెప్పారు. ఆహారం విషయంలో తనకు పెద్దగా పట్టింపులు లేవని.. వెజ్, నాన్వెజ్ రెండూ ఇష్టమేని బండి సంజయ్ చెప్పారు.
టీఆర్ఎస్ సీనియర్ నేతపై భారీ మెజార్టీతో విజయం
1994లో 23 ఏళ్ల ప్రాయంలోనే బండి సంజయ్.. కరీంనగర్ అర్బన్ బ్యాంకు డైరెక్టర్గా పోటీ చేసి విజయం సాధించారు. 2000 సంవత్సరంలో మారోసారి బ్యాంకు డైరెక్టర్గా ఎంపికయ్యారు. 2005లో బీజేపీ నుంచి తొలిసారిగా కౌన్సిలర్గా గెలిచారు. 2010లో 48వ డివిజన్కు మరోసారి కార్పొరేటర్గా భారీ మెజారిటీతో గెలిచారు. 2014, 2018లలో కరీంనగర్ స్థానం నుంచి బీజేపీ ఎమ్మెల్యే అభ్యర్థిగా పోటీ చేసి స్వల్ప తేడాతో ఓడిపోయారు. ఆ తర్వాత జరిగిన పార్లమెంటు ఎన్నికల్లో పోటీ చేసి.. టీఆర్ఎస్ సీనియర్ నేత బోయినపల్లి వినోద్ కుమార్పై గెలుపొందారు. రాష్ట్రంలో కాంగ్రెస్, బీజేపీ నుంచి గెలిచిన ఎంపీలందరికంటే ఎక్కువ మెజారిటీతో ఆయన గెలుపొందడం విశేషం.
నాన్న నా ఎదుగుదల చూడలేదు.. ఆ బాధ ఇప్పటికీ వేధిస్తుంది
తన తండ్రి నర్సయ్యకు కూడా ఆర్ఎస్ఎస్ మూలాలు ఉన్నాయని బండి సంజయ్ గతంలో తెలిపారు. దీంతో తనను అన్ని విధాలా ప్రోత్సహించేవారని చెప్పారు. ‘ఏబీవీపీ విద్యార్థి సంఘంలో ఉన్నప్పుడు విద్యార్థులు, వారి తల్లిదండ్రులు నా దగ్గరికి వచ్చి కాలేజీ సమస్యలు చెపుతుండేవారు.. ఆ సమయంలో నాన్న నన్ను గమనించేవారు. ఏబీవీపీ నాయకుడిగా గొడవల్లో పాల్గొన్నప్పుడు పోలీసులు ఇంటికి వచ్చి నన్ను తీసుకెళ్లినా.. ఆయన అడ్డు చెప్పేవారు కాదు. నన్ను పూర్తి స్థాయిలో ప్రోత్సహించారు. కానీ, అనుకోకుండా చనిపోయారు. ఆయన నా ఎదుగుదలను చూడకుండానే వెళ్లిపోయారనే బాధ ఇప్పటికీ వేధిస్తుంది’ అని బండి సంజయ్ తెలిపారు.
ఎన్నికల వరకే రాజకీయాలు.. ఆ ఇద్దరినీ అన్నలాగే గౌరవిస్తా!
మంత్రి గంగుల కమలాకర్, తాను 2005లో కౌన్సిలర్గా కలిసి పనిచేశామని బండి సంజయ్ తెలిపారు. ఆ సమయంలో వారి మధ్య కొంత సాన్నిహిత్యం ఉండేదని చెప్పారు. 2009లో టీఆర్ఎస్ నుంచి గంగుల ఎమ్మెల్యే అయ్యారని.. 2014, 2018 అసెంబ్లీ ఎన్నికల్లో తామిద్దరం పరస్పరం పోటీపడ్డామని ఆయన గుర్తు చేశారు. దీంతో రాజకీయంగా కొంత గ్యాప్ వచ్చిందని చెప్పారు. కాంగ్రెస్ సీనియర్ నేత, మాజీ ఎంపీ పొన్నం ప్రభాకర్తో జూనియర్ కాలేజ్ స్థాయి నుంచే రాజకీయంగా వైరుధ్యం ఉండేదని బండి సంజయ్ తెలిపారు. ఆయన కాంగ్రెస్ అనుబంధ విద్యార్థి సంస్థ ఎన్ఎస్యూఐలో ఉంటే.. తాను ఏబీవీపీలో కీలకంగా ఉండేవాడినని చెప్పారు. రాజకీయంగా వైరుధ్యం ఉన్నా.. వ్యక్తిగతంగా తమకు ఎలాంటి ద్వేషాలు లేవని చెబుతారు. ‘ఆ ఇద్దరినీ నేను అన్న లాగే గౌరవిస్తా.. రాజకీయాలు ఎన్నికల వరకే అని నమ్ముతా’ అని బండి సంజయ్ అంటారు. ఇలాంటి వ్యక్తిత్వమే ఇప్పుడు ఆయణ్ని తెలంగాణలో బీజేపీకి పెద్దన్నగా నిలబెట్టిందేమో…