బీచ్‌కి వెళ్దాం బ‌ట్ట‌లు లేకుండా -మెడికల్ విద్యార్ధినికి వేధింపులు
నెల్లూరు జీజీహెచ్‌లో వైద్య విద్యార్థినిపై ఆస్పత్రి సూపరింటెండెంట్ లైంగిక వేధింపుల ఘటనపై జగన్ ప్రభుత్వం తీవ్రంగా రియాక్ట్ అయింది. ఈ వ్యవహారానికి సంబంధించి ఆడియో టేప్ సోషల్ మీడియాలో వైరల్ కావడంతో ప్రభుత్వం సీరియస్ అయింది. వెంటనే సీనియర్‌ వైద్యులతో త్రిసభ్య కమిటీ ఏర్పాటు చేయాలని నిర్ణయించింది. సూపరింటెండెంట్ లైంగిక వేధింపుల ఆరోణలపై విచారణ జరిపి.. వెంటనే నివేదిక ఇవ్వాలని మంత్రి ఆళ్లనాని ఆదేశించారు.
ఇక, జీజీహెచ్ ఘటనపై రెండు కమిటీలు విచారణ చేపడుతున్నాయి. ఒకటి డీఎంఈ తరపున ఏసీఎస్‌ఆర్‌ మెడికల్ కాలేజీ ప్రిన్సిపల్ సాంబశివరావు నేతృత్వంలో నలుగురు సభ్యులతో కూడిన కమిటీ.. మరొకటి జిల్లా తరఫున ఇండిపెండెంట్ కమిటీ. జిల్లా కమిటీలో జెడ్పీ సీఈవో, ఐసీడీఎస్ పీడీ, జాయింట్ కలెక్టర్ (ఆసరా)తో త్రిసభ్యులు ఉంటారు.
డీఎంఈ తరఫు కమిటీ అంతర్గతంగా విచారణ జపితే.. జిల్లా కమిటీ బయటి నుంచి ఎంక్వైరీ చేస్తుంది. ఇప్పటివరకు ఈ ఘటనపై ఎలాంటి ఫిర్యాదు రాకపోయినా.. ఇది సీరియస్ ఇష్యూ కాబట్టి ఉన్నతాధికారులు సుమోటోగా తీసుకుని విచారణ చేపట్టారు. 24 గంటల్లో జిల్లా కమిటీ ప్రాథమిక విచారణ కమిటీ నివేదిక వస్తుందని.. లైంగిక వేధింపులు జరిగినట్లు తేలితే కఠిన చర్యలు తప్పవని అధికారులు హెచ్చరించారు.
అసలేం జరిగిందంటే..!
నెల్లూరు పెద్దాస్పత్రి సూపరింటెండెంట్ కీచకపర్వం తాజాగా వెలుగుచూసింది. కూతురి కంటే తక్కువ వయసు ఉండే జూనియర్ మహిళా డాక్టర్లతో వంకర మాటలు.. అసభ్య చేష్టలతో ప్రత్యక్ష నరకం చూపిస్తున్నాడు. దీంతో విసిగివేసారిపోయిన హౌస్ సర్జన్ ఫోన్‌లో ఆయన్ను ఏకిపారేశారు. ప్రస్తుతం ఈ ఆడియో టేప్ సోషల్ మీడియాలో వైరల్ కావడం కలకలం రేపుతోంది.
నెల్లూరు జీజీహెచ్ ఆస్పత్రిలో హౌస్ సర్జన్లుగా పని చేస్తున్న వైద్య విద్యార్థినులు, ఆస్పత్రి మహిళా సిబ్బందిని లైంగిక వేధింపులకు సూపరింటెండెంట్ గురిచేస్తున్నాడని తీవ్ర ఆరోపణలు వస్తున్నాయి. సూపరింటెండెంట్‌తో ఓ హౌస్ సర్జన్ మాట్లాడిన ఆడియో టేప్ బయటికొచ్చింది. బీచ్‌కి రమ్మని.. రెస్టారెంట్‌కి రమ్మని ఎలా అడుగుతారు సార్ అంటూ ఆమె నిలదీసిన ఘటనతో ఆయన లైంగిక వేధింపుల వ్యవహారం వెలుగులోకి వచ్చింది.
‘‘నా రూమ్‌లో ఏసీ ఉంది వస్తావా.. నీ కాళ్లు చేతులూ కట్టేసి నోటికి ప్లాస్టర్ వేసైనా తీసుకెళ్తా’’ అంటూ నరకం చూపించారని యువ వైద్యురాలు ఫోన్‌లోనే సూపరింటెండెంట్ నిలదీశారు. కారులో ఒంటరిగా రావాలని.. నీ రూమ్‌లో ఏసీ లేదు.. నా రూమ్‌కి రా.. అని ఎలా అడుగుతారంటూ వైద్య విద్యార్థిని అడిగిన ప్రశ్నలకు ఆయన సమాధానం దాటవేసేందుకు ప్రయత్నించారు. ‘‘నీ కూతురికి కూడా నా వయసే ఉంటుంది.. బహుశా, ఆమె నాకంటే పెద్దదై కూడా ఉంటుంది. ఆమెతో ఎవరైనా ఇలానే చేస్తే ఏం చేస్తారు? నీలాగే 60- 65 ఏళ్ల వయసున్న వ్యక్తి నీ కూతురిని పెళ్లి చేసుకుంటానంటే నువ్వు ఒప్పకుంటావా’’ అంటూ ఆ యువ వైద్యురాలు ఏకిపారేసింది. ఈ ఆడియో టేప్ వైరల్ అవడంతో సంచలనంగా మారింది. ఆస్పత్రి సిబ్బందితో కూడా ఆ సూపరింటెండెంట్ అసభ్యకరంగా ప్రవర్తించేవారని ఆరోపణలు వస్తున్నాయి.
మహిళా కమిషన్ ఫైర్
నెల్లూరు జీజీహెచ్ సూపరింటెండెంట్ లైంగిక వేధింపులపై ఏపీ మహిళా కమిషన్ ఆగ్రహం వ్యక్తం చేసింది. ఈ ఆరోపణలపై సమగ్ర దర్యాప్తు జరపాలని మహిళా కమిషన్ చైర్పర్సన్ వాసిరెడ్డి పద్మ ఆదేశించారు. ఈ మేరకు నెల్లూరు జిల్లా కలెక్టర్‌తో మహిళా కమిషన్ చైర్పర్సన్ వాసిరెడ్డి పద్మ మాట్లాడారు. వైద్యవృత్తికి మచ్చతెచ్చేలా జీజీహెచ్ సూపరింటెండెంట్ వ్యవహరించడం బాధాకరమన్నారు. అతడి బాధితులు నిర్భయంగా మహిళా కమిషన్‌కు వివరాలు వెల్లడించాలని చైర్పర్సన్ వాసిరెడ్డి పద్మ సూచించారు. వైద్య విద్యార్థినుల పట్ల అసభ్య ప్రవర్తనకు సంబంధించి బాధితులు 9394528968 వాట్సాప్ నంబర్‌కు స్వయంగా సంప్రదించవచ్చన్నారు. ఫిర్యాదులు చేసిన బాధితుల వివరాలు గోప్యంగా ఉంచుతామని స్పష్టం చేశారు.