ఏపీ రాజ‌కీయాల్లోకి ఎంట్రీ ఇస్తున్న ఎంఐఎం
విజ‌య‌వాడ‌లోని మున్సిపల్ కార్పొరేషన్ ఎన్నికల్లో అసదుద్దీన్ ఓవైసీ పార్టీకి చెందిన ఇద్దరు అభ్యర్థులు బరిలో దిగారు. పశ్చిమ నిజయోకవర్గం పరిధిలోని రెండు స్థానాల్లో మజ్లిస్ అభ్యర్థులు పోటీ చేస్తున్నారు. వీరి తరఫున నాంపల్లి ఎమ్మెల్యే జేఎం హుస్సేన్ గురువారం ప్రచారం నిర్వహించారు.
గతంలో కేవలం హైదరాబాద్ నగరానికి మాత్రమే పరిమితమైన ఎంఐఎం క్రమంగా దేశంలోని ఇతర ప్రాంతాలకు విస్తరిస్తోంది. తెలంగాణలోని భైంసా, నిజామాబాద్ ప్రాంతాల్లో సత్తా చాటిన ఈ పార్టీ.. మహారాష్ట్ర, బిహార్ అసెంబ్లీ ఎన్నికల్లోనూ ‘పతంగి’ని ఎగరేసింది. పశ్చిమ బెంగాల్ ఎన్నికల్లోనూ ఎంఐఎం బరిలోకి దిగుతోంది. ముస్లింలు పెద్ద సంఖ్యలో ఉండే ప్రాంతాల్లో పోటీ చేస్తున్న ఈ పార్టీ దేశవ్యాప్తంగా సత్తా చాటాలని ఉవ్విళ్లూరుతోంది.
సీఏఏ, ఎన్‌ఆర్సీసీకి వ్యతిరేకంగా 2020 ఫిబ్రవరిలో విజయవాడలో నిర్వహించిన సమావేశంలో అసదుద్దీన్ ఓవైసీ పాల్గొన్నారు. మోదీ సర్కారుపై విమర్శలు గుప్పించిన ఆయన.. సీఏఏను వ్యతిరేకించాలని జగన్ సర్కారుకు సూచించారు. ఆ సభలో కేశినేని నాని, ఓవైసీ ఇద్దరూ ఒకే వేదికపై నుంచి ప్రసంగించారు.
విజయవాడ కార్పొరేషన్ ఎన్నికల విషయానికి వస్తే.. టీడీపీ మేయర్ అభ్యర్థిగా కేశినేని నాని కుమార్తె శ్వేత పేరును ఆ పార్టీ రాష్ట్ర అధ్యక్షుడు అచ్చెన్నాయుడు ఖరారు చేశారు. మార్చి 10న మున్సిపల్ ఎన్నికలు జరగనున్నాయి.