క‌లెక్ట‌ర్‌పై హత్య కేసు నమోదు
ఒడిశా రాష్ట్రంలో సంచ‌ల‌న ఘటన చోటు చేసుకుంది. ఏకంగా జిల్లా కలెక్టర్ మీదే హత్య కేసు న‌మోదైంది. హత్యానేరం, సాక్ష్యాలను నాశనం చేశారనే అభియోగాలపై మల్కన్‌గిరి జిల్లా కలెక్టర్ మనీశ్ అగర్వాల్‌‌తో పాటు ఘటనతో సంబంధం ఉన్న సిబ్బందిపై కేసు నమోదు చేయాల్సిందిగా స్థానిక సబ్‌ డివిజనల్‌ మేజిస్ట్రేట్‌ న్యాయస్థానం పోలీసులను ఆదేశించింది. మాజీ పీఏ దేబ్‌ నారాయణ్‌ పండా మృతి కేసులో న్యాయస్థానం ఈ మేరకు ఆదేశాలు జారీ చేసింది.
కోర్టు ఆదేశాల మేరకు మల్కన్‌గిరి కలెక్టర్ మనీశ్ అగర్వాల్‌, మరో ముగ్గురు సిబ్బందిపై కేసు నమోదు చేసినట్లు పోలీసులు తెలిపారు. మాజీ పీఏ పండా కనిపించటం లేదంటూ గత సంవత్సరం ఆయన కుటుంబ సభ్యులు ఫిర్యాదు చేశారు. గత డిసెంబర్ 28న ఆయన మృతదేహం మల్కన్‌గిరి పట్టణ సమీపంలోని ఓ రిజర్వాయర్‌లో లభించింది.
పండా ఆత్మహత్య చేసుకున్నారని మొదట భావించారు. అయితే 6 నెలల తర్వాత కలెక్టర్, మరి కొందరు సిబ్బంది తన భర్తను హత్య చేశారంటూ ఆయన భార్య ఫిర్యాదు చేశారు. దీంతో ఈ ఘటన సంచలనంగా మారింది. బాధితుడి భార్య తమకు న్యాయం చేయాలంటూ రాష్ట్ర మానవ హక్కుల సంఘాన్ని ఆశ్రయించారు. ఘటనను తీవ్రంగా పరిగణించిన మానవ హక్కుల సంఘం ఈ వ్యవహారంలో చర్య తీసుకోవాల్సిందిగా పోలీసు డీఐజీకి ఆదేశాలు జారీ చేసింది. మరోవైపు.. తనపై హత్య కేసు నమోదైన అంశంపై కలెక్టర్ మనీశ్ అగర్వాల్‌ స్పందించాల్సి ఉంది.