దొర వైఫల్యాలతో ఓ గ్రంథమే రాయొచ్చు.. విజయశాంతి ఘాటు విమర్శలు
తెలంగాణ కాంగ్రెస్ కమిటీ ఛైర్ పర్సన్ విజయశాంతి మరోసారి తనదైన శైలిలో కేసీఆర్ సర్కార్‌పై విమర్శలు చేశారు. కరోనా చికిత్స, ఎమ్మార్వో లంచం వంటి వర్తమాన అంశాలను ప్రస్తావించి ప్రభుత్వం పూర్తిగా వైఫల్యం చెందిందని మండిపడ్డారు. ఈ మేరకు విజయశాంతి తన ఫేస్‌బుక్, ట్విటర్ అధికారిక ఖాతాల వేదికగా విమర్శలు చేశారు. కేసీఆర్ ప్రభుత్వ వైఫల్యాలతో ఓ గ్రంథమే తయారు చేయవచ్చని ఎద్దేవా చేశారు.
‘‘తెలంగాణ రాష్ట్ర పరిపాలనా యంత్రాంగం అన్ని రంగాల్లోనూ ఘోరంగా విఫలమైందని చెప్పడానికి తాజా పరిణామాలే నిదర్శనం. చినుకు పడితే చాలు జలమయమయ్యే హైదరాబాదును ఎలాగూ కాపాడలేకపోయారు. ఇప్పుడు ప్రభుత్వ చేతగానితనానికి వరంగల్ కూడా బలైంది. ఇక భూకబ్జాలను ఆపలేక రెవెన్యూ వ్యవస్థ ఎంత అద్భుతంగా పనిచేస్తోందో ఈ మధ్య బట్టబయలైన కోటి రూపాయల లంచం ఘటనే చెబుతోంది.’’
‘‘తెలంగాణలో అత్యంత ప్రధానమైనదీ… కోవిడ్ చికిత్సా కేంద్రంగానూ ఉన్న గాంధీ ఆస్పత్రి పలుమార్లు అగ్నిప్రమాదానికి గురైనా అక్కడ ఫైర్ సేఫ్టీ వ్యవస్థ నీరుగారి ఎక్కడ వేసిన గొంగళి అక్కడే అన్నట్టుంది. ఇక కోవిడ్ చికిత్సా వ్యవస్థ అనేది అటు ప్రభుత్వాసుపత్రులు, ఇటు ప్రయివేట్ ఆసుపత్రుల్లోనూ కుప్పకూలిపోయిందనడానికి హైకోర్టు వేసిన మొట్టికాయల గాయాలే సాక్ష్యం. ప్రభుత్వ తీరుపై వైద్యులు, నర్సులు, లాబ్ టెక్నీషియన్లు, పారిశుద్ధ్య కార్మికుల అసంతృప్తి గురించి చెప్పాల్సిన పనిలేదు. మరోవైపు పంటలు నీటమునిగి ఆవేదనలో ఉన్న అన్నదాతలను కనీసం స్థాయిలోనైనా ఆదుకోలేని దుస్థితి. ఇలా చెప్పుకుంటూ పోతే కేసీఆర్ దొరగారి పరిపాలనా వైఫల్యంపై పెద్ద గ్రంథమే రాయవచ్చు. ఇకనైనా మేలుకోండి.. పరిపాలనా వ్యవస్థను చక్కదిద్దండి.’’ అని విజయశాంతి తన ఫేస్‌బుక్ ఖాతాలో రాసుకొచ్చారు.