పెళ్లైన రెండో రోజే వధువుకు కరోనా !
శుభమా అని పెళ్లి చేసుకుంటే.. పెళ్లైన రెండో రేజే వధువుకు కరోనా సోకినట్లు నిర్ధారణ అయింది. దీంతో పెళ్లింట్లో అలజడి రేగింది. మధ్యప్రదేశ్‌లోని భోపాల్ సమీపంలో ఈ ఘటన చోటు చేసుకుంది. వధువు, వరుడి కుటుంబసభ్యులతో పాటు ఆ వివాహానికి హాజరైన బంధువులు.. మొత్తం 32 మందిని అధికారులు క్వారంటైన్‌కు తరలించారు. వారి నమూనాలను సేకరించి వైద్య పరీక్షలకు పంపించారు. పెళ్లికి ముందు నుంచే యువతి దగ్గు, జ్వరంతో బాధ పడుతున్నట్లు పోలీసుల విచారణలో తేలింది. జ్వరం తగ్గడానికి మాత్రలు వేసుకొని ఆమె పెళ్లి పీటలపై కూర్చునట్లు వెల్లడైంది.
భోపాల్‌లోని జ‌ట్ ఖేడి ప్రాంతానికి చెందిన ఓ యువ‌తికి మంగ‌ళ‌వారం (మే 19) ఓ యువకుడితో వివాహం జరిగింది. ఈ పెళ్లికి ప‌రిమిత సంఖ్యలో బంధువులు హాజరయ్యారు. పెళ్లికి ముందు నుంచే జ‌లుబు, జ్వరంతో బాధ పడుతున్న యువతి.. ఎందుకైనా మంచిద‌ని కరోనా ప‌రీక్షలు చేయించుకుంది. గురువారం వెల్లడైన ఫలితాల్లో పాజిటివ్‌గా తేలడంతో పెళ్లి వారంతా షాక్‌కు గురయ్యారు.
ఈ ఘటన తర్వాత మధ్యప్రదేశ్‌లో తీవ్ర కలకలం రేగింది. భోపాల్, గ్వాలియర్, ఇండోర్ తదితర ప్రాంతాల్లో గత కొన్ని రోజులుగా పెళ్లిళ్లకు హాజరైన వారు ఆందోళనకు గురవుతున్నారు. హెల్ప్ లైన్ సెంటర్లకు కాల్ చేస్తున్నారు. లాక్‌డౌన్‌ను పొడిగిస్తూ నిర్ణయం తీసుకున్న కేంద్ర ప్రభుత్వం పలు సడలింపులు ఇచ్చిన విషయం తెలిసిందే. 50 మంది బంధువుల సమక్షంలో వివాహం జ‌రుపుకొనేందుకు కేంద్రం అనుమ‌తించింది. అయితే.. వధువుకే కరోనా సోకడంతో వివాహాలకు హాజరు కావడానికి ప్రజలు వణికిపోతున్నారు. మధ్యప్రదేశ్‌లో కరోనా కేసుల సంఖ్య 6 వేలు దాటాయి.