హీరో అల్లు అర్జున్ కుమార్తె సినిమాల్లోకి ఎంట్రీ

అల్లు కుటుంబం నుండి మ‌రో తార వెండితెర‌కు పరిచ‌యం కాబోతున్నారు. ఇప్ప‌టికే అల్లు రామ‌లింగ‌య్య కుటుంబం నుండి అల్లు అర్జున్ అత‌ని త‌మ్ముడు సినిమా హీరోలుగా తెలుగు సినిమా ప్ర‌పంచాన్ని ఏలుతున్నారు. ఇప్పుడు అల్లు అర్జున్ కుమార్తె అర్హ కూడా సినిమాల్లోకి ఎంట్రీ ఇవ్వ‌నుంది. గుణ‌ణశేఖర్ దర్శకత్వం వహిస్తున్న ‘శాకుంతలం’ సినిమాలో ఐకాన్ స్టార్ అల్లు అర్జున్ కుమార్తె అర్హ కూడా నటిస్తోంది. ఈ విషయాన్ని అల్లు అర్జున్ సోషల్ మీడియా ద్వారా వెల్లడించారు. అల్లు వారి కుటుంబం నుంచి నాలుగో తరం సినిమాల్లోకి ఎంట్రీ ఇస్తుండడం పట్ల గర్వంగా ఉందని అల్లు అర్జున్ ట్వీట్ చేశారు. ‘శాకుంతలం’ మూవీ ద్వారా అల్లు అర్హ సినిమా రంగంలో ప్రవేశిస్తోందని వివరించారు. ఇంతటి చక్కని సినిమా ద్వారా తన కుమార్తెను వెండితెరకు పరిచయం చేస్తున్నందుకు దర్శకుడు గుణశేఖర్, నీలిమ గుణలకు కృతజ్ఞతలు తెలుపుకుంటున్నానని బన్నీ చెప్పారు. కాగా, ‘శాకుంతలం’ సినిమాలో అల్లు అర్హ చిన్ననాటి భరతుడిగా కనిపించనుంది. శకుంతల, దుష్యంతుల కుమారుడే భరతుడు. శకుంతల, దుష్యంతుడి ప్రేమకావ్యాన్ని గుణశేఖర్ ‘శాకుంతలం’ చిత్ర ఇతివృత్తంగా తీసుకున్నారు. ఇందులో సమంత ప్రధానపాత్ర పోషిస్తోంది . దుష్యంతుడిగా కేరళ యాక్టర్ దేవ్ మోహన్ నటిస్తున్నారు. ఈ సినిమాకు మణిశర్మ సంగీతం అందిస్తున్నారు.