ఎమ్మెల్యే రోజా ఇంట్లోనే బాబుకి, కేసీఆర్ కుదిరింది

తెలంగాణ-ఏపీ నీటి వివాదంపై రాష్ట్ర బీజేపీ అధ్యక్షుడు బండి సంజయ్ మరోసారి తీవ్రంగా స్పందించారు. ముఖ్యమంత్రి కేసీఆర్ తీరుపై ఆయన వ్యాఖ్యలు చేశారు. తెలంగాణ లక్ష్యాలైన నీళ్లు, నిధులు, నియామకాలను కేసీఆర్ ఏపీ ముఖ్యమంత్రి జగన్మోహన్ రెడ్డికి తాకట్టు పెట్టారని ఆరోపించారు. హైదరాబాద్‌లోని బీజేపీ రాష్ట్ర కార్యాలయంలో మంగళవారం బండి సంజయ్ మీడియాతో మాట్లాడారు. 2015లో జూన్ 18, 19 తేదీలలో మొదటిసారి జరిగిన సమావేశంలో నీటి పంపకాలపై తెలంగాణ సాగు నీటి సలహాదారు విద్యాసాగర్, హరీశ్ రావు అంగీకారం తెలిపిన మాట వాస్తవం కాదా? అని బండి సంజయ్ ప్రశ్నించారు.
క్యురేక ఆన్‌లైన్ క్విజ్‌తో బోలెడంత టైం పాస్! దానితో పాటు కాయిన్లు గెలుచుకోవచ్చు
‘‘ఆ తర్వాత 2016 సెప్టెంబర్ 21న జరిగిన మొదటి అపెక్స్ కౌన్సిల్ సమావేశంలో కేసీఆర్, చంద్రబాబులు మాట్లాడుకున్నారు. 299 టీఎంసీల నీళ్లు తెలంగాణకు, 512 టీఎంసీల నీళ్లు ఆంధ్రప్రదేశ్‌కు ఆనాడు కేటాయింపులు చేసుకున్న మాట నిజం కాదా? 811 టీఎంసీలలో 575 టీఎంసీల నీళ్లు తెలంగాణకు రావాలని గతేడాది మే 12న రజత్ కుమార్ లేఖ రాశారు. అప్పటి కౌన్సిల్ సమావేశంలో తెలంగాణకు అన్యాయం జరిగేలా మొదట ఒప్పుకున్నదే కేసీఆర్.
రోజా ఇంటికి వెళ్ళినప్పుడు రెండు రాష్ట్రాల ముఖ్యమంత్రులు కేసీఆర్, జగన్ మధ్య ఈ రహస్య ఒప్పందం జరిగింది. 203 జీవో మే5న జారీ చేస్తే మొదట స్పందించింది మేమే. గతేడాది మే 11న దీనిపై కేంద్ర జలశక్తి మంత్రికి లేఖ రాసింది కూడా నేనే. ఆంధ్రప్రదేశ్ ప్రభుత్వం చేపడుతున్న నిర్మాణాలపై మే 12న ముఖ్యమంత్రి కేసీఆర్ ఆయన సీఎస్‌తో లేఖ రాయించారు. మేము ఇచ్చిన ఫిర్యాదు మేరకు కేంద్ర జలశక్తి కేఆర్ఎంబీని ఏపీ ప్రాజెక్టుల నిర్మాణం ఆపేలా చూడాలని కోరింది. ఈ ఏడేళ్ల వ్యవధిలో ముఖ్యమంత్రి చేసిన కార్యక్రమాలపై షెడ్యూలు విడుదల చేయగలారా? మే నెల మొత్తం లేఖల ద్వారా హెచ్చరించినా కూడా ఆగస్టులో పనులు జరుగుతున్నాయని తెలిసినా సీఎం ఎందుకు మౌనంగా ఉండిపోయారు.
ప్రాజెక్టుల నిర్మాణ పనులు పూర్తయ్యే సమయానికి రెండు రాష్ట్రాల ముఖ్యమంత్రులు పోలీసులు మోహరించేలా చేసి డ్రామాలు ఆడుతున్నారు. హుజురాబాద్ ఎన్నికలు ముగిసే వరకు ఈ డ్రామా ఇలాగే నడుస్తుంది. ప్రాజెక్టుల నిర్మాణం జరిగే చోట అవసరమైతే రెండు రాష్ట్రాల పోలీసులు కొట్టుకుంటారు. కొత్త డ్రామాలకు తెరలేపి.. రాష్ట్ర ప్రజలను మోసం చేస్తున్నారు.’’ అంటూ బంజయ్ తీవ్ర స్థాయిలో ఆరోపణలు చేశారు.